State Referral Hospital tihchangtlun hna October 15, 2016-ah zawh hman tum
State Referral Hospital-a medical college, Mizoram Institute of Medical Education and Research (MIMER) din a nih theihna tura sorkarin hma a lak mekah, damdawi-in hmunhma tihchangtlun leh cheibâwl hna chu October 15, 2016 hmain zawh tum a ni.
MIMER din tur hian Mizoram sorkar chuan State Referral Hospital chu a thuam ṭha mek zel a, hna thawktu KMV Ltd., Hyderabad chuan June 2015
aṭang khan Administrative building leh damdawi-in building thawm
ṭhat leh tihchangtlun hna an thawk ṭan a; chu chu tun thla, October 15-ah zawh hman tum a ni.
Building-te chu medical college din a nih theihna tura Medical Council of India (MCI)-in tehfung a siam a tlin theih nan thawm ṭhat a ni a; hmanraw chi hrang hrangte pawh tun hnaiah eng maw zat dah thar a nih bakah, dah belh zel tum a ni bawk.
Hmunhma tihchangtlun
Chawlhkar liam taa Vanglaini palaiin State Referral Hospital a tlawh lai pawhin damdawi-in building leh administrative buidling-te chu thawm ṭhat mek a ni a; tun dinhmunah Administrative block, OPD block, Diagnostic block, Physiology laboratory room, hall, Biochemistry room, Hospital ward block leh khum 60 awm belh theihna turte sak hna thawh mek a ni.
Library room tur sak zawh a ni tawh a, Administrative building sak chhunzawm mekah hall zau tak siam zawh tawh a ni. Lehkhabu leh hmanraw mamawh turte nei turin hmalak mek niin, lehkhabu leitu tur thlan nan tender an buaipui mek. Damdawi-in hotute chuan, MCI-in kuminah kalphung hrang hrang an thlak avangin an uluk zual a, kalphung chu zawm a harsa tulh tulh dawn niin an sawi.
State Referral Hospital hi pantu an tam tawh avangin lirthei dahna pawh a buai ṭan mek a, Casualty pantute leh damlo phurtute tlan velna tur felfai taka ruahman mek a ni.
Damdawi-in hotute chuan, sorkar ṭan lakna chu lawmawm an tih rualin, "MCI Norms anga kal tur chuan thawktu dah belh kawngah sorkarin ṭan a lak zel a ngai dawn a, mipui thlawpna pawh kan mamawh dawn hle. MCI Norms ang chuan doctor zawng zawng pawh inpawtkhawm mah ila, a la tih theih rih chuang lo a, a tahtawlin hmasawnna a kal zel a ni," an ti.
Hmanrua leh khawl thar
Referral Hospital-ah hian tun hnai thla hnih/khat aṭang khan khawl changkang leh man to tak tak eng emaw zat dah thar a ni. September 8-ah Endoscopy khawl changkang tak dah thar a ni a, khawl hmang chuan mi 100 vel an en tawh.
Inzaina, operation theatre (OT) room paruk paruk awm tur a nih laiin, pathum chu hman a ni tawh a; OT-ah hian khawl ṭha tak tak dah thar a ni. Hnim hlum khawl, Anaesthesia Work Station-a hman tur khawl thar pahnih chu August 30, 2016 khan an nei thar a, pakhat hi cheng nuai sarih vel man a ni.
June 2016 khan damlo zaina hmanraw ṭha chi Diatherm Machine pahnih an nei thar a; hemi rual hian damlo zai tur blood pressure, oxygen mamawh dan, lung (heart) leh thil dang enna patient monitor pahnih an nei thar a ni. OT-ah hian inzai laia êng ṭha chi pahnih, cheng nuai hnih man vel an nei thar bawk. Hmanraw ṭha zawka OT an thuam avang hian ni khatah mi 10 vel zel an zai tawh a; kuminah major operation 970 awm tawhin, minor operation chu kum khatah mi 6,000 vel an tling ṭhin.
August thla khan Ultrasound khawl thar pakhat dah a ni a, tunlai hian ni khatah mi 20 vel an en
ṭhin. Thawktute chuan, tun hma aia khawl a ṭhat tâk avang leh a pantu an tam avangin en pawh an tam tawh tih an sawi. X-ray khawl erawh tun hmaa an neih sa bak dah belh a la awm lo.
Thisen dah khawlna, Blood Storage Centre an peih tawh a, khawl changkang zawka thuam a ni a; mahse, electric current a awm ṭhat tawk loh avangin duh angin an hmang thei lo thung. DNA endikna khawl an nei tawh a, bun mek a ni. Thisena potassium leh sodium enna khawl pawh September 27-ah bun a ni a, khaihlak awm loa damdawi hman tur dahṭhatnaah pawh damdawi eng emaw zat a awm. RSBY pindan pawh thuam mek zel a ni.
Thisen, zun, êk leh thil dang enfiahna laboratory room chu tihchangtlun niin, thil chi hrang hrang 31 an enfiah thei tawh a; thla tin nau nei an pung zela ngaih niin, thla khatah naute 60 vel an piang zel anga chawhrual a ni.