KHAWTHLIR

MJA meeting

Mizoram Journalists' Association (MJA) general headquarters chuan nimin khan Aizawl Press Club-ah Hqrs. huam General Body Meeting an nei a, thil pawimawh chi hrang hrang an sawiho. Meeting hi MJA vice president Zonunsanga Khiangte-in a kaihruai a; president Vanlalrema Vantawl leh MJA president hlui K Sapdangate'n thu an sawi.

Thisen pe

Sateek Branch YMA chuan nimin khan Aizawl Civil Hospital tan thisen unit 34 an pe a, a petute mipa 32 leh hmeichhia pahnih an ni. Chhinga Veng Branch KṬP pawhin October 5 khan Aizawl Civil Hospital tan thisen unit 39 an pe a, a petute mipa 36 leh hmeichhia pathum an ni.

Literature meet

MSU gen.hqrs. chuan nimin khan IPR Auditorium-ah 'Zo Literature Meet' an buatsaih a, B Lalthangliana leh H Lalrinfela paper buatsaih an zirho. B Lalthangliana'n 'Kan thu leh hla aṭanga hnam khat kan nihzia a lan dan' tih thupui a sawi a; H Lalrinfela'n 'Literature-in hnam inpumkhatna a thlen theih dan' tih thupui a sawi thung.

Mei zu 6 man

Aizawl district Anti Tobacco Squad chuan nimin khan Mizoram University campus-ah squad drive an nei a, MZU Anti Tobacco Squad member-te leh MZU-a venhimna lam thawktute COTPA dan an zirtir nghal. Squad drive-ah hian phal lohna hmun a mei zu mi paruk an man a, pawisa an chawitir a ni.

Scout & Guides

Bharat Scout and Guides-a national commissioner (Scouts) Dr HP Chhetri chuan nimin khan Mizoram State Bharat Scout & Guides a tlawh a, chief commissioner Zothanmawia leh a thawhpuite'n an lo dawngsawng. An inkawmhonaah Mizoram State Bharat Scout & Guides hmasawn zel dan tur an sawiho a ni.