MNF-in stamp duty tihhniam an phût nawn

MNF party chuan Mizoram sorkarin hriattirna chhuah stamp duty leh ragistration fee rate thar anga a lak chu tihniam turin an ngen nawn leh a; tihniam a nih ngei theih nan hmalak chhunzawm zel an tum thu an puang.

MNF general secretary MC Lalrinthanga chuan nimin khan Mizo Hnam Runa MNF President pisaah thuthar thehdarhtute kâwmin, stamp duty lak danah Mizoram sorkar chu dan bawhchhiaah a puh a; "Sorkar kalphungah Act reng reng Rules-in a chhunzawm tur a ni a, Rules a chhuah hnuah hman chauh tur a nih laiin, Rules chhuah hmain an hmang a ni," a ti.

MC Lalrinthanga sawi danin, kum 1996-ah Congress sorkarin ‘The Indian Stamp Act ( Mizoram Amentment ) Act-1996’ a pass a, chutah chuan stamp duty rate tihsan a ni. MNF a sorkar hnuah kum 2007 khan The Indian Stamp (Mizoram Amentment ) Act 2007 an siam a, stamp buty bika pawisa chawi tur chu tihniam niin, a tam berah Rs. 500 pêl lo tura tih a ni.

Conress a sorkar leh hnuah tun hnaiah stamp duty chu nasa taka tihsan leh a ni tih sawiin, MC Lalrinthanga chuan, "A sang uchuak em em a, mipui náwlpui tan phurrit lian tak a tling. A punna rate hi 1500% aia sang vek a ni a, ṭum khata chhiah tihpunna sang uchuak lutuk hi khawvel ram dangah pawh a váng viau awm e," a ti.

MNF hotute tarlan danin, Congress sor-karin September 29, 2016-ah Rules a ti-chhuak a, chu chu government gazette-a chhuah a nih aṭanga hman ṭan tur tih a ni. Chutih laiin, notification tihchhuah hmain stamp duty chu rate thar angin lak a ni.

MC Lalrinthanga chuan, stamp duty rate thar chu tihniam nghal turin Mizoram sorkar an phût tih sawiin, "Mipui phurrit tizângkhai tura sorkar kan nawrna hi sorkarin a tihhlawhtlin hma chuan kan nawr dawn a, mipui hmakhaw ngaia kan nawrnaah mipui harsatna neuh neuh thleng palh a awm a nih pawhin mipuite hriatthiamna kan dil a ni," a ti.

MNF hruaitute chuan, stamp duty lak chu tunah chawlhsan rih a nia sawiin, chawlhsan a nih avangin mipuite'n harsatna an tawk niin an sawi. Zawhna chhangin, stamp duty lak an chawlhsan ṭan hun an hriat loh thu leh, October 5, 2016-a Land Revenue & Settlement pisa an enfiahnaah an lo chawlhsan tawh a, computer an hmante pawh an dah bo vek niin an sawi a ni.