HM-in Ṭawngṭai Bethel Camping Centre tlawh

Ruihhlo do kawnga sorkar leh Central YMA thawhhona kal zelah, Home minister R Lalzirliana chuan nimin khan Ṭawngṭai Bethel Camping Centre, Chawnpuia camper hmeichhiate awmna tur sak mek a tlawh.

Home Minister chuan, Mizoramah ruihhlo a pung zel tih sawiin, "Ruihhlo leh zu ngawlvei an tam tel telh a. Police, Excise leh CYMA-in ruih-hlo do beihpui an thlaknaah ngawlvei tihdam chu thil pawimawh tak a ni tih an hriat tel avangin ngawlveite enkawlna hmun tur hi ngaihtuah a ni. Ṭawngṭai Bethel Camping Centre-in inhawng taka thawhpui an lo remti hi a lawmawm hle," a ti.

Ngawlveite enkawl dam chu ruihhlo do hlawhtlinna pawimawh tak tur pakhat a nih thu sawiin R Lalzirliana chuan, sorkar beisei loa Pathian rin chhana an hmalaknaa Ṭawngṭai Bethel Camping Centre-a thawktute chu lawmthu a hrilh a; a ṭul anga hman atan Rs. 50,000 a hlan.

Home Minister hi DMR minister C Ngunlianchunga, parliamentary secretary (Home) Lt.Col. ZS Zuala, Police leh Excise hotute leh Central YMA hruaitute'n an ṭawiawm. C Ngunlianchunga hian Centre tan hian tarpauline bag 5 leh Rs. 50,000 a pe.

Hmeichhe camper-te awmna tur sak mek hi September 2016-ah sak ṭan a ni a, chhawng hnih tura ruahman a ni.