Covid-19 testing laboratory April 2-ah peih hman beisei

Health & Family Welfare Board (HFWB) vice chairman Dr ZR Thiamsanga, MLA chuan, ICMR aṭangin COVID-19 testing laboratory siam phalna hmuh a nih tawh thu leh laboratory buaipui mek chu April 2, 2020-ah hman ṭan theih beisei a nih thu a sawi.

Dr ZR Thiamsanga chuan March 28, Inrinnia State Referral Hospital an tlawhnaah thu sawiin, Covid-19 testing laboratory nei turin sorkarin hma a lak mek thu sawiin, "Doctor pahnih leh technician pahnihte Silchar Medical College-ah training neihtir mek an ni," a ti. Dr ZR Thiamsanga chuan, State Referral Hospital-a thawkte leh Covid-19 vei enkawltu doctor, nurse leh thawktu dangte chu an him tâwk tih sawiin, "Thawktute hian mahni nunna thàpin mi dang tan an thawk a, in lama an haw dawnah uluk takin an intifai a, mi dang tan an hlauhawm lo," a ti a; an rilru tihnual thei zawnga ṭawng lo turin mipui a ngen.

HFWB Vice Chairman sawi danin, Covid-19 vei enkawltu tura ruatte chu an inchhâwk a, enkawltu apiangte chu an hun a zawh veleh quarantine-a awmtir an ni. Health secretary H Lalengmawia chuan, Covid-19 laka invèn nan hmai tuamna (mask) leh kutkawr hman chu mi hrisel pangngai tan thil pawimawh ber a ni lo tih sawiin, "Mask leh kutkawrte hi damlo te, damlo enkawltute leh damdawi-ina hman tur a ni ber a. Mi hrisel pangngaiin kan hmang a nih pawhin a ṭha a, mahse, kan hman danah kan fi mkhur loh chuan Covid-19 kaina a dâl chuang lo," a ti a; hrileng laka invên nan kut silfai uluk leh awm hran leh ina inkhung 

a pawimawh ber thu a sawi. Covid-19 testing laboratory chungchangah H Lalengmawia chuan, Mizorama laboratory lama mithiam ber berte'n an buaipui thu a sawi a; ZMC-a TB laboratory tur siam mek, 70% vel zawh tawh chu sorkar laipuiah Covid-19 laboratory atan hman phawt an dil a, phalsak an nih thu leh, hmanraw awm sa bakah Mizoram University leh Pachhunga University College-a bungraw ṭhenkhatte hmang telin April 2-ah enchhin theih beisei a nih thu a sawi bawk. Health Secretary chuan, Covid-19 do kawngah Mizoram mipuite'n sorkar an thlàwp ṭhat avangin lawmthu a sawi a; social media-a thu dah (post) chungchangah fimkhur tur leh social media-a thu thehdarhte awih mai lo turin mipui a chah a; IPR department aṭanga chhuakte leh chanchinbu leh TV news-te ring turin mipui a ngen a ni.