Lemziaka inelnaa ti ṭhate lawmman hlan

Disaster Management & Rehabilitation (DMR) department-in September 30, 2016-a JL High School-a State Level Painting Competition an buatsaiha ti ṭhate hnenah nimin khan DMR minister C Ngunlianchunga'n a pisaah lawmman a hlan.

Lemziaka inelna hi zirlai naupang kum 10-14 tana buatsaih a ni a, thupui chu 'Disaster versus collective strength' tih leh, 'Disaster management begins at home/school' tihte a ni. Sikul hrang hrang aṭangin kum 14 hnuai lam naupang 83 an tel.

Inelnaa lawmman dawngtute chu - pakhatna Lalmuanpuii d/o Vanlalsiama, PC Girls School; pahnihna C Lalchhandami d/o C Lalthansanga, Mary Mount School leh, pathumna H Vanlalduhsaki d/o H Remliana, Mary Mount School-te an ni. Lawmman dawngtute hi November 3-5, 2016 chhunga New Delhi-a 'Asian Ministerial Conference on Disaster Risk Reduction 2016' neih turah Mizoram State aiawhin National Level Painting Competition an tel ang.

DMR Minister chuan, inelna thianghlim naupangte rilru ngaihtuahna hmantir a, an ngaihtuah chhuah aṭanga an thil ziahte chuan naupang zawkte hnenah chhiatna laka himna tur ngaihtuahna a neihtir thei tih sawiin, zau leh tam zawka kalpui zel tur a nih thu a sawi a; national level painting competition-a Mizoram aiawha tel tur naupang pathumte chu DMR department-in theihtawpa a puih tur thu sawin, duhsakna a hlan.

C Ngunlianchunga chuan, Mizoram chu lirnghing leh chhiatna hrang hrang lakah a him loh avangin pawl ang leh department anga nasa zawka hmalak a ṭul thu a sawia, "Kan chhiatna tam tak hi kan fimkhur loh vanga thleng a ni fo a, mahni sahimna tur kan zawn thiam leh zirtirna pawh kan inpek tam deuh deuh a ṭul a ni," a ti.