CM Hawla leh Bangladesh Minister inkâwm

Bangladesh state minister for Water Resources Muhammad Nazrul Islam chuan Nilaini tlai khan chief minister Lal Thanhawla a kâwm a; Bangladesh leh Mizoram inkalpawhna leh insumdawn tawnna chungchang an sawi dun.

CM Lal Thanhawla chuan, India independence hmain Mizote chhuahká ber chu Chittagong, Cox’s Bazar leh Rangamati-te a nih thu sawiin, Mizoram leh Bangladesh inkara lui dunga inkalpawhna chu tharthawh leh ṭha a tih thu a sawi a; kumin July thlaa Shillong-a hmarchhak bial leh ṭhenawm ramte'n lui leh lui dungte hman ṭangkai dan sawihona Nadi 2016-ah pawh lui dung leh a kaihhnawihte sawiho a nih thu a hrilh.

Lal Thanhawla chuan, Kaladan Multi Modal Transit Transport Project chungchang sawiin, he project hi a taka ṭan a nih hunah chuan Bangladesh pawhin a hlâwkpui ngei a rin thu a sawi a; mipui tan eizawnna leh hmasawnna lama kawng tam zawk a hawn ngei a beisei thu a sawi bawk.

Bangladesh Minister chuan, Chittagong Hill Tracts chu hawn zauh mek zel a nih thu sawiin, hnam tlém zawkte hmasawnna chu Bangladesh sorkarin a ngaih pawimawh thu a sawi a, "India hmarchhaka hmasawnnate hi Bangadesh leh mipuite'n engtin nge an hlâwkpuia an ṭangkaipui theih ang tih hi Bangladesh sorkarin a thlir reng a ni," a ti.

Muhammad Nazrul Islam chuan, Bangladesh prime minister Sheikh Hasina-i'n India leh India hmarchhak state-te nena insumdawn tawnna a dah pawimawh thu sawiin, ramria insumdawn tawnna atan border haat a tam thei ang ber din a nih theih ram pahnihte'n a ṭul angte chak taka an bawhzui a ṭul thu a sawi bawk.

Bangladesh Minister hi Nilaini zan khan CM Lal Thanhawla'n zahriah a buatsaihsak a ni.