Ni 100 inhlawh dan tur ruahman

Rural Development department chuan thingtlang mipui tan ram chhunga lockdown chhunga ni 100 inhlawh dan tur a ruahman tih sorkar thuchhuah chuan a tarlang.

Inkharkhip a nih avangin a taka hna thawh theih hmain demand siam lâwk a ni a, boruak a pangngai veleh hna a taka thawh tura ruahman a ni. MGNREGS hnuaia ni khat hlawh Rs. 211 chu Rs. 225-ah tihsan a ni a, hei hi April 2020 aṭanga hman nghal tur a ni. Ni 100 inhlawhna hi district ṭhenkhatah chuan sorkar kum 2019-20 chhung atan an thawk zo tawh a, ni 100 la inhlawh ve lo district-te chu demand siamtir mek a ni.

Ministry of Rural Development aṭangin MGNREGA inhlawhna (wage) atan Mizoram sorkarin March 3, 2020 khan cheng vbc. 30.22 leh March 17-ah vbc. 15.31 a dawng a, National Electronic Fund Management System hmangin job card neitute bank account-ah thun a ni tawh. Kum 2019-20 chhunga Mizoramin sum a la dawn kim lohte hmuh thuai a nih theih nan ṭan lak a ni a, Mizoramin cheng vbc. 40 chuang hmuh tur a la nei a ni.