NLUP auto-rickshaw 70 sem leh Cong sorkar chhung sem tum

NLUP hnuaia auto-rickshaw thlangtu mi 70 hnenah nimin khan Mizo High School Field-ah auto-rickshaw hlan leh a ni a; auto-rickshaw semtu chief minister Lal Thanhawla chuan, sorkarna an siam chhung chuan NLUP an sem dawn thu a sawi.

Chief Minister chuan, "NLUP hian chhungkaw tam tak tuam tawh mah se, rahbi tleu chhungkua eng emaw zat leh dâwngdah vanga hlawhtling lote an la awm. Kan sorkar chhung kan sem dawn. NEDP hi NLUP tipuitlingtu leh chhawmdawltu a ni tih hriat a pawimawh," a ti.

Lal Thanhawla chuan, "Kut hnathawktu, lo neitu leh huan neitute hlawhtlinna kan hmu chho mek a, sawichhiatna leh elrêlna karah pawh NLUP dawngtu zingah hlawhtlingpui tam tak an awm," a ti a; NLUP dawngte zinga a hlawhtlinpui lo zawnga kalpui an awm chu vanduaithlak a tih thu a sawi.

CM Hawla chuan, auto-rick-shaw dawngtute chu hlawhtling tura duhsakna a hlan a; motor khalhtute chu hnam darthlalang an ni tih hria a, hawihháwm leh rinawm takin an passenger-te dawngsawng turin a chah.

Industries minister H Rohluna pawhin thu sawiin, NLUP trade zingah auto-rickshaw chu a hlawhtling berte zinga mi nia a hriat thu a sawi a, "Trade dangte angin nghah a ngai lo a, taima leh rim taka thawk NLUP first phase leh second phase-a auto-rickshaw dawngtu ṭhenkhatte chuan an hlawh chhuah atangin motor lian zawk lei an awm a ni," a ti.

Auro-rickshaw dawngtute hi Tuichang bial aṭangin mi panga, Lengteng biala mi 10, East Tuipui biala mi pariat, Champhai North biala mi pasarih, Champhai South biala mi 10, Kolasib biala mi pariat, Tuirial biala mi paruk, Serlui biala mi 10 leh Hrangturzo biala mi paruk an ni. Auto-rickshaw hi pakhat Rs. 1,27,695 man a ni.

NLUP hnuaiah hian auto-rickshaw hi first phase-ah 69, second phase-ah 196, third phase-ah mi 135 an dawng tawh a; mi 158 hnenah sem leh tum a ni.