Gas harsat chhan - transporter-te vang
Tunlaia eirawngbawlna gas váng chungchangah Food, Civil Supplies & Consumer Affairs department chuan thuchhuah a siam a; gas harsat chhan bulpui ber chu gas phur transporter-te vang a nih thu a tarlang.
Sorkar thuchhuah chuan, gas transporter-te'n hun rei tak aṭang tawhin gas an tihchingpen ṭhin thu sawiin, "Supply department leh Central YMA-ten ṭha an tih loh avangin July 4, 2016 aṭang khan ṭang dunin, distribution point-ah YMA branch/LC/VC-te an bûktir ta a ni," a ti.
FCSCA chuan, gas transporter-te'n tender-an chhànin, gas tihchingpen chhût tel rânin a hniam lamin an chhang ṭhin niin an sawi a, "Distribution point-a gas bûrte bûk a nih hnuah transporter-te hi a hmaa an hlâwk angin an hlâwk thei tawh lo a. Hei vang hian kawhmawh chi hrang hrang an báwl ta a ni," an ti. A hmaa thla tin bûr 1,20,000 vel dawng ṭhinin kumin July thla aṭangin thla khatah bûr 90,000 vel chiah an dawng ta niin an sawi.
FCSCA tarlan danin, Chief Minister-in IOC Chairman hnenah transporter-te'n harsatna an siam dante a hrilh a, harsatna chinfelsak tura a hriattir bakah, distributor dah belh turin a ngen. Union Minister for Petroleum hnenah IOC chauh ni lo, BPCL, HPCL leh private gas distributor-te Mizorama an inbun theih nan hma lakpui turin a ngen bawk.
FCSCA Secretary-in October 4, 2016-ah Guwahati-ah IOC hotute an hmu a, gas harsatna an sawipui. IOC chuan gas distributor- te chu transporter angin gas an phurh a phalsak dawn a; transporter-te chu delayed movement/poor performance vangin show cause notice an pe a ni.
Supply department chuan, Mualkhang leh Borkhola-ah chuan gas a tam thu sawiin, "Transportation hi tuna buaina ber a ni a, tuna harsatna hi thil dik duh vang a ni," an ti a; gas harsatna thleng mekah sorkar hmalakna ngaichâng zel turin mipui an ngen.