Lunglei truck-te'n Buhfai phur dawn lo

Lunglei district-a Truck Owners Association (LTOA) leh Truck Drivers Association (LTDA)-te chuan Lunglei-Tlabung kawng, National High-way-302 chu sorkarin a thawm ṭhat hma chuan October 10, 2016 aṭangin buhfai an phur dawn tawh rih lo tih an puang.

LTOA leh LTDA-te chuan thuchhuah siamin, Lunglei-Tlabung kawngpui leh kawngpuia lei (bridge)-te chu a chhiat tawh lutuk avangin buhfai phur motor tan kal ngaihna a awm tawh loa an ngaih thu an tarlang a, "Kan motor tam takin a chhiat phah bakah, tun hnaiah buhfai phur motor-in accident a tawh phah nghe nghe," an ti.

Pawl pahnihte chuan, "He kawng hi sorkarin a thawm ṭhat a, a siamṭhat hma chuan October 10, 2016 aṭangin buhfai kan phur thei tawh dawn lo a ni," an ti a; Lunglei district khawthlang lam mipuite'n harsatna an tawk a nih pawhin, hrethiam turin an ngen a ni.