Myanmar-a zin Mizo 28-te Mizoramah an lut thei lo

Mizoram mi, Myanmar ram zina Mizorama rawn lêt leh tum mi 28-te chu Ṭiau lei kaltlang phalsak an nih loh avangin March 28, Inrinni zan aṭang khan Zokhawthar leh Myanmar inkalpawhna Ṭiau leiah an riak. Champhai Police hotute hnen aṭanga thu dawn danin, Ministry of Home Affairs (MHA) phalna lo chuan tun dinhmunah international boundary kaltlang phal a ni tawh lo. Inrinni pawh khan mi 28-te chu Mizoram lama hruai kîr tuma hmalak a ni a, mahse, tihfel ngai a tam avangin lak luh theih an ni lo.

Mizoram sorkar chuan hemi chungchangah hian sorkar laipui an dâwr reng a ni. A tira Zokhawthar gate-a dan zawng zawng chu mi 30 an ni a, Inrinni khan MHA chuan 

mi pahnih chu Mizorama rawn luh phalna a pe a ni. Ṭiau leia tangkhangte hi Myanmar lama thil chi hrang hrang vanga zinte an ni a; MHA aṭangin Mizorama luh phalna hmuh a nih pawhin, quarantine centre-ah dah nghal vek tur an ni. Zokhawthar khawtlang hruaitute chuan Vanglaini palai zawhna chhangin, khualzin tangkhangte chu an buaipui thu an sawi a, "An ei leh in turte kan pe a, silpauline kan zàrsak a ni," an ti.