Hmasawnna lo thleng tur atan Mipuite inbuatsaih a ṭul - Hawla

Chief minister Lal Thanhawla chuan nimin khan Congress Bhavan-ah thu a sawi a; hmasawnna lo thleng turah Mizo mipuite kawng hrang hranga an inbuatsaih a ṭul thu a sawi.

Asia chhimchhak lam ramte nena insumdawn tawnna turin hmalak zel a nih thu sawiin Lal Thanhawla chuan, "Hmasawnna lo thleng tur atan hian rilru zau zawk kan put a, páwn lam aṭanga hmasawnna lo kalte'n min tihchhiat vek lohna atan rilru leh economy lamah kan inbuatsaih a ngai," a ti.

Chief Minister chuan, India independence hma chuan Mizoram chhim lam chu Mizoram chhuahka pawimawh a nih ṭhin thu sawiin, "Independence hnuah hmar lam kan hawi a, tunah hian chhim lam hi chhuahka pawimawh ni tur buatsaih mek a ni," a ti a; a kaihhruai sorkar chuan hmasawnna atan theihtawp an chhuah thu a sawi.