Bawlhhlawh paih sawiho dawn

Vawiin aṭangin  Aizawl khawpui bawlhh lawh paihtute'n bawlh hlawh khawn rih loh an tum a, hemi chungchang hi Aizawl Municipal Corporation (AMC) hotute'n vawiinah an sawipui dawn. Aizawl khawpuia bawlhhlawh paihtu PPP Mode Bawlhhlawh Paih Welfare-te March 27, 2020-a ṭhukhawm chuan, Covid-19 léng mekah a kai hmasa páwla ṭang thei leh pu darh thei an nih avangin March 30 aṭanga lockdown tàwp hun April 14, 2020 thleng bawlhhlawh paih chhunzawm loh an rél a ni. Bawlhhlawh paihtute chuan, an thurel chu bawlhhlawh paih motor khalh zawng zawngte zâwm vek turin an hriattir a, "Chawlh chhunga mipuite'n harsatna an tawh turah hriatthiamna kan dil a ni. An bawlhhlawh neihte ṭha taka pack a, paih theih veleh a felfai taka paih a nih theih nan lo dah khâwl turin kan ngen a ni," an ti.

Hemi chungchangah hian AMC mayor PC Lalhmingthanga chuan Vanglaini palai zawhna chhangin, a hma pawhin bawlhhlawh paih tihtawp rih an rèl tawh thu a sawi a, "Kan sawipui a, an paih chhunzawm leh a ni. March 30-ah kan sawipui leh dawn a, an thawmhnaw hâk tur leh bun turte kan pe vek ang. Bawlhhlawh paihtute hian harsatna an tâwk ve a, ṭhenkhat chuan an in luahna aṭanga hnawhchhuaha vaute an tâwk a ni," a ti.