Police-in FIR an thehlut

Mizoram Police Sub ordinate Officer Association (MPSOA) chuan tun hnaia social media-a thu dik lo hmanga force mite demna thehdarh a awm avangin nimin khan Aizawl Police Station-ah FIR an thehlut. MPSOA chuan, tun hnaiah 'Zoramin record a break. 1. Cr.PC 144 hmanga curfew puanah force an mu ṭhuap a, mipui an duty. 2. Mipuiin curfew duhin sorkar an nawr. 3. Khawvela curfew hlih hun chhung rei lo ber' tihte a darh thu an tarlang a, "He thuthang hi force mite tihmualpho tumna leh mipui rilrua thu dik lo tuh duhna rawngkai nia kan hriat avangin kan lawm lo hle a ni," an ti.

Force mite'n Covid-19 avangin a thim a vár an thlu hman lo tih sawiin MPSOA chuan, "Zoram mipui him nan theihtawp chhuahin kan duty a ni. Hri danna thuam famkim nei loin screening neihna hmunah te, isolation centre-a quarantine dahna hmunahte leh ramri khârna hmunahte pawh kan duty a ni," an ti a; hetiang a nih laia force mite an mu ṭhuap tih chu dâwt hulhual a nih thu an sawi. MPSOA chuan, mipui hriata thu dik lo thehdarh chíngte an fimkhur zawkna atan leh thu dik zîktluak lo hmanga force mite chirhtheh chíngte'n an tih tawh lohna atan a ṭul anga hmalak an duh thu FIR-ah an ziak a ni.