Covid-19 test result hriat tharah mi 9-in an kai lo tih finfiah a ni

Mi 12-te Covid-19 an kai leh kai loh tihchianna tura March 28, Inrinnia throat swab Silchar Medical College (SMC)-a thawn chu nimin tlai dar 5 thleng khan mi pakuate result hriat a ni tawh a, Covid-19 an kai lo vek; mi dang pathum result nghah mek a ni.

State Referral Hospital-ZMC Covid-19 Task Force Bulletin nimin tlaia tihchhuaha an tarlan danin, Inrinni tlai dar 5 leh nimin Pathianni tlai dar 5 inkar (darkar 24 chhung)-ah Covid-19 kai rinhlelh mi pathum an awm a, chungte nen chuan rin hlelh kai mi 12 an awm. Nimin khan throat swab sample pakhat SMC-ah thawn leh a ni.

Covid-19 vei vanga State Referral Hospital-a enkawl mek pastor pakhat chu ICU-ah a la awm mek a, a dinhmun erawh a ṭha nia thu dawn a ni. Referral Hospital-ah hian Covid-19 vei enkawlna tura ruahman Isolation Ward-ah awm an awm rih lo a; High Risk Ward-ah mi panga enkawl niin, chu'ng zinga pathum chu nimin lama dah an ni.

Low Risk Ward-ah mi pakhat enkawl a ni bawk. Hetih lai hian, India ram pumah coronavirus kai mi 979 hmuh chhuah a ni tawh a, chu'ng zinga 931 chu India mi niin, 48 chu ram dang mi an ni a; mi 87 enkawl dam an nih tawh laiin, mi 25-in an thih phah tawh a ni