MUHCS hnuaiah mi 592-te senso Rs 36,21,840 pek tlak a ni tawh

Mizoram Universal Health Care Scheme (MUHCS) chu April 1, 2025-a kalpui ṭan a nih hnuah nimin thlengin damdawi-ina damlo enkawlte tana bill lut, mi 592-te tana senso Rs 36,21,840 pek tlak a ni tawh.

Mizoram State Health Care Society chuan nimin khan MUHCS dinhmun an tarlang a, "MUHCS hnuaia inenkawlna sensote hi damdawi-in hnenah pek tlak nghal zel a ni a, tun dinhmunah damdawi-ina damlote enkawlna atana bill lo lut 592-te senso Rs 36,21,840 chu pek tlak vek tawh a ni. MUHCS hnuaiah hian phai lama enkawl ngai (refer) mi 200 chuang thawn an ni tawh bawk," an ti.

MSHCS chuan, MUHCS hnuaiah damlote chu man chawi loa enkawl an nih thu tarlangin, "Scheme tharin a tum ang ngeiin damlote chu mahni insengso loa a thlawna inenkawlna (cashless) pek an ni. Scheme thar a nihna angin thawktu ṭhenkhatte'n hriat fuh loh laite an lo neihte a ṭul ang zelin zirtirna pek an ni bawk," an ti a; scheme kalpui danah her rem ngai laite siam rem zel a nih thu an tarlang.

MUHCS chungchanga harsatna emaw, hriat chian duh emaw neite tan MSHCS office-ah zawhfiah theih reng a nih thu an tarlang bawk.