Aizawl chhung kawngpui siam ṭan a ni; Kawng siam kan vil dawn - PWD Minister

Aizawl khawpui chhung kawngpui siam (resurfacing) hna chu April 15, (Thawhlehni) zan khan ṭan a ni. Kawng siam bul ṭanna PWD minister Vanlalhlana'n a hmanpui a, kawng ṭha leh tlo neih a nih theih nan kawng siam hnathawh chu uluk taka an vil dawn thu a sawi.

Aizawl kawngpui siamah hian km. 84-a thui siam a ni dawn a, PWD Aizawl Road North Division hnuaiah km. 44-a thui leh Aizawl Road South Division hnuaiah km. 40-a thui siam a ni dawn. Kawng siamtu chu Nidhi Creative Infrastructure Pvt. Ltd. Silchar, Assam niin, thla 18 chhunga thawh zawh hman tura ruahman a ni a, siam zawh hnuah kum 3 chhung an enkawl zui ang.

April 15 zan khan Ramhlun North-ah kawng siam bul ṭanna hun hman a ni a, hun hman zawhah kawng siam ṭan nghal a ni. PWD Minister chuan, kawng ṭha leh tlo tak siam a nih theih nan an vil zui dawn thu a sawi a, "Contractor thlanah pawh kan uluk hle. Company hian thil a nih dan tur takin an ti em, bitumen an pawlh ṭha tawk em, temperature a dik em, thickness a ṭha tawk em tihte PWD engineer-te nen kan vil zui tur thu contractor ka hrilh," a ti.

Aizawl khawpui chhung kawng siamna atan contractor-in Cachar lama lung chang ṭha an hman dawn thu sawiin Vanlalhlana chuan, "Kawngpui ṭha nei tura theihtawp kan chhuahnaah thuràwn dawng turin kan inpeih reng. Kan hnathawhah ṭha lo lai a awm a nih chuan mipuite'n sawisel hreh tur a ni lo, thurawn inpekna aṭang hian thil ṭha zawk a chhuak thei a ni," a ti a; thuràwn pekah inthlahrung lo turin mipui a chah.

PWD Minister chuan, kawngpuite chu dimdawi a ngaih thu sawiin, "Hemi kawngah hian mipuite'n ṭan kan lak a ṭul hle dawn. In sakna tur rod chhut ngil leh lirthei silna leh insûkna thli luantir nan kawngpui kan hmang ṭhin hi kawngin a ngeih lo," a ti a; kawngpui tichhe zawnga thil ti lo turin mipui a ngen.

Aizawl kawngpui siam ṭanna inkhawmah hian PWD engineer-in-chief H Zoramliana leh officer dang te, Central YMA leh Aizawl City Local Council Asso-ciation hruaitute an tel a ni.