Ngaizel khâm leh Hlimen enfiah a ni

Council of Scientific and Industrial-Central Institute of Mining and Fuel Research (CSIR-CIMFR) chief scientist Dr C Sawmliana leh Aizawl District Disaster Management Authority (ADDMA) chairman Lalhriatpuia hoin ADDMA hotute'n nimin khan Ngaizel khâm leh Hlimen an enfiah a, DC conference hall-ah hmalak dan tur an sawiho bawk.

DC conference hall-a sawihonaah hian Ngaizel leh Hlimen khâm aṭang lung tla ṭhin leh lei tawlh awm ṭhin ven dan tur leh tihnêp dan tur ngaihtuah a ni a; leilung chungchanga mithiam Dr Laldinpuia, Mizoram University associate professor leh Dr Remruatfela, Pachhunga University University-a assistant professor ten Ngaihzel leh Hlimen khâm leh a leilung an zir tawhna chanchin a lem nen an entir bakah, inven dan leh tihnêp dan an tarlang.

Mithiamte chuan, real time landslide early warning system a rang lama Ngaizel leh Hlimen bakah, Aizawl khawpui huam chhunga leimin awm ṭhinna hmunahte dah thei ni se, tiin an rawt a; landslide early warning system chu cheng nuai 13 vel sengin 50 vel lei theih a nih thu an sawi.

Dr C Sawmliana chuan, invenna tluantling a awm theihna tura rawtna a neihte a sawi a; Mizorama mithiamte nen ṭanghoin expert company-te DPR siamtir a, lung a tlak tawh lohna tura hnathawh pawh anmahni thawhtir nghal a ṭhat thu a sawi.

Permanent solution nei turin sum sên ngai a tam dawn tih sawiin Dr C Sawmliana chuan, DPR fel tak nen central lama thehluh vat hi a kawnghmang ber nia a hriat thu a sawi a, "Mizorama kan mithiamte'n research an lo nei tawhna data-te hi a ṭha em em a, a la ṭangkai hle dawn a ni," a ti.

Dr C Sawmliana hi Good Friday hmang tura Mizorama lo haw a ni a, Indian School of Mines, Dhanbad-a engineering a zirpui ṭhin Aizawl DC Lalhriatpuia sawmna ngai pawimawhin Ngaizel khâm leh Hlimena lung tawlhna ṭhin hmunte a enpui a ni.