Veterinary Polyclinic-ah ni 10 chhungin hri dannain ui 455 chiu

Manipur-ah ui a hri (rabies) a lên avangin district hrang hranga Animal Husbandry & Veterinary (AH&Vety) office-te chuan tunlai hian ui a hri danna (anti-rabies vaccine) an pe mek a; Veterinary Polyclinic, Aizawl bikah ni ruk chhungin hri dannain ui 455 an chiu tawh.

Ui a hri lêng mek vang hian district magistrate-te chuan an huam chhungah Manipur aṭanga ui lak luh khapna leh ui khuahkhirhna thupek an chhuah tawh. Ui vulhtute chu an ui vulhte anti-rabies vaccine pe vek tur leh mi dang tana harsatna siam thei zawnga ui vulh lo tura hriattir an ni.

AH&Vety department aṭanga thu dawn danin, Aizawla Veterinary Polyclinic-ah chuan April 7-16, 2025 chhungin anti-rabies vaccine-in ui 455 chiu a ni a; district dangahte pawh ui eng emaw zat damdawi pek a ni tawh.

Manipur aṭangin ui leh uisa lak luh khap a ni a, ui khuahkhirh loin mihring a seh chuan ui neitu chu thla ruk chhung jail-a tàntir emaw, Rs 5,000 thleng chawitir emawa hrem theih a ni.

Khawzawl District Magistrate tarlan danin, The Mizoram Animal (Control & Taxation) Rules, 2016-in a phal angin a neitu tel loa khawlaia ui chhuakte chu village council-te'n an man thei a; ui neitute'n ni khatah ui chaw man Rs 100 leh pawisa chawi tur (fine) Rs 100 zel pein an khul thei. Ni sarih chhunga khul a nih loh chuan ui chu a remchan dana tihral (auction) theih a ni bawk.