Pharmacy Council-in Mizoramah Pharmacy Skill Development Centre sak theih an duh

Health & Family Welfare minister Lalrinpuii leh Pharmacy Council of India (PCI) president Dr Montukumar Patel chu nimin khan minister pisaah an inkâwm a; PCI President chuan, Mizoram sorkarin ram a pek theih chuan Pharmacy Skill Development Centre an sak theih thu a hrilh.

Dr Montukumar Patel chuan, Mizoramah wholesale leh retail-a damdawi hralh danah danin a phût, pharmacist-te mawhphurhna chu a taka kenkawh ṭha a tih thu a sawi bawk.

Lalrinpuii chuan, PCI President thusawi chu a rang thei ang bera bawhzui a tum tur thu a sawi a, "Damdawi lei leh hralha pharmacist-te tih turte hlen turin sorkarin chak takin hma a la mek. Mizo ṭhalaite zingah damdawi hmang sual an tam a, drugs control lamah chak zawka hmalak tum a ni," a ti.

Health Minister chuan, Mizoramin damdawi siamtu (pharmaceutical company) a neih a, damdawi ṭha leh rintlak siam chhuah ve a nih theih nan hmalak a duh thu a sawi a, chumi tur chuan Mizorama pharmacist-te thawhpuiah a sáwm a ni.

Inkawmnaah hian Food and Drug Administration (FDA) Drug Control Officer, State Pharmacy Council leh Mizoram Pharmacists Association member an tel.