Serchhip College zirlaite'n kawng an dang

Serchhip College Student Union bultumin Serchhip College zirlaite chuan nimin zing dar 9 aṭang khan an college paltlang vantlang kawngpui an dang a; an thil phût chu sorkar hotute'n academic session tharah tihhlawhtlin a nih tur thu an sawi avangin zing dar 9:30-ah kawngpui dan an titawp.

Serchhip aṭanga thu dawn danin, February 17, 2025-a chief minister Lalduhoma, Serchhip bialtu MLA-in Serchhip District Hospital-a ultrasound a hawnnaah Serchhip College hnenah Geography zirtirtu nghet pahnih, Zoology-ah zirtirtu nghet pakhat leh nghet lo pakhat leh, BCA-ah zirtirtu nghet lo pakhat pek a tiam a; CM-in a lo tiam tawh tihhlawhtlin phûtin zirlaite'n nimin khan kawng an dang a ni.

MZP Headquarters, Serchhip hruaitute'n Higher & Technical Education minister Dr Vanlalthlana an biak hnuah leh Serchhip bawrhsap Paul L Khuma'n theihtawpa hmalakpui a tum thu a sawi avangin zirlaite chuan kawng dan an titawp.

Serchhip MZP hruaitute'n an biaknaah HTE Minister chuan, CM-in a lo sawi tawh leh Serchhip College thil phût chungchangah hian, academic session 2024-25 chhungah chuan college exam a hnaih tawh avangin transfer tih an tum tawh loh thu a sawi a; exam zawh hnuah Serchhip College zirlaite thil phût chu tihhlawhlin a nih theih nan hmalak a tum thu a sawi a ni.