KHAWTHLIR

Thaidawr enfiah

MZP General Headquarters hruaitute chuan nimin khan Phuldungsei Thaidawr tlanga Tripura sorkarin hma a lakna hmun an tlawh. MZP chuan, Tripura sorkarin Mizoram chhungah kut a rawn thlak chu hriatthiam har an tih thu an tarlang a; Tripura sorkar hmalakna chu tihtawptir tur leh Thaidawr tlang panna kawng ngaihven vat turin Mizoram sorkar an ngen bawk.

Bengdar sem

South Tuipui bialtu MLA Jeje Lalpekhlua chuan nimin khan Hnahthiala a pisaah a bial chhunga beng ṭha lo mi 20 hnenah MLA fund aṭanga lei bengdar a hlan a, a duh apiang tana dàwr theih turin a pisaah a ṭhu nghal bawk. Jeje Lalpekhlua chuan, a biala mit leh beng ṭha lote tan theihtawp a chhuah thu sawiin, "Tun hi a tawpna tur a ni lo a, chhunzawm zel a ni ang," a ti.

Hâl phal tawh lo

Champhai district bawrhsap Mohammad Aaquib chuan thupek chhuahin, sorkarin lo, huan leh leipui hâl theih hun tàwp atana a ruat March 15, 2025 a liam tawh avangin Champhai district-ah lo, huan leh leipui hâl phal a nih tawh loh thu a tarlang.

Chakma kût hmang

April 15, Thawhlehnin zan khan minister Lalthansanga'n Andarmanik khuaah Chakma kût, Biju Miloni a hmanpui. Minister chuan, "Hnam hnuaihnung zawkte politics ball-a hman in ni ṭhin hi tihreh kan tum a, zirna hi hnam khai chhuahna hmanrua a nih avangin nu leh pate'n kan fate zirna kan ngai pawimawh tur a ni," a ti. Chakma kutah hian hnam lâm leh zaite entir a ni.

BJP hnatlang

BJP party mite chu Dr BR Ambedkar pian champha pualin nimin khan Upper Republic-a BJP pisa bul hnaiah kawngpui sir, luikawr leh tuikhur bulte tifaiin an hnatlang. Hnatlanga telte hi BJP, Mizoram Pradesh vice president Vanupa Zathang leh State Core Group member Lalrinliana Sailo ten an ho a ni.