Minister-in YMA in sak thar a hawng

Minister C Lalsawi-vunga chuan April 15, Thawhlehni zan khan a bial chhunga YMA, Venghlui Branch Taitesena Section Rûn, Rs 8,00,000 hmanga sak thar a hawng a; YMA member-te chu ruihhlo, hlemhlêtna leh mipat hmeichhiatna hman khawlohna lakah an fihlim a ṭul thu a sawi.

C Lalsawivunga chuan, YMA-in thil tum ṭha tak tak a neih laia YMA member-te ruih theih thilin a tihbuai tam tak an awm chu thil inhmeh lo a nih thu a sawi a, "Khawvel mithmuha min timualphotu a tling a, mipat hmeichhiatna leh hlemhletnate hi kan ram ṭhanmawhbâwk a ni. Kristian nun dan ṭha ngaihsan tumtu YMA-te'n kan nun lairil berah Isua kan dah a ṭul," a ti.

Chief minister Lalduhoma kaihruai sorkarin tun hnaiah aikal lak a titawp tih sawiin, "Aikal lak hi India sorkarin a phal loh tawp a ni a, hun rei tak kan ramah chuan aikal lak a ni a, a latu tam takin eizawnna dang dapin an hna berah mi dang an chhawr chhawng ṭhin hi Kristianna nen a inhmeh lo a ni," a ti. ZPM sorkarin sorkar hmasate hmalakna hawisan loin chhunzawm hmasakah a nei a, chu chuan hmasawna tam tak a thlen thu a sawi bawk.