Thawnthu tâwi inziahsiak lawmman sem

State Council of Educational Research and Training (SCERT) leh Mizo Language Development Board (MLDB) ten pawl 5-8 zirlaite tana thawnthu tâwi inziahsiak an buatsaiha lawmmante chu nimin khan ATI Auditorium-ah sem a ni a; Art & Culture minister C Lalsawivunga'n hmanpuiin, MLDB website leh logo a tlangzarh nghal.

C Lalsawivunga chuan, ṭawng chu hnam tin nuna bet, hnam ro hlu ber zinga mi a nih thu sawiin, "Ṭhangtharte'n Mizo ṭawng pawimawhzia an hriat chian lehzual theihna tur leh ṭawng dik zawk an zir theihna tura SCERT leh MLDB hmalakna a ropui," a ti a; Mizo ṭawng hlutzia leh hman dik a pawimawhzia hre thar zel turin zirlaite a chah.

Mizo ṭhalaite zingah tunlai hian ṭawng hmang dik lo leh hawrawp dik mumal lo hman a hluar thu sawiin Art & Culture Minister chuan, "Inzirtir kan uar sauh sauh a ṭul hle a ni," a ti.

Inkhawm hi MLDB secretary Lalsangpuia'n a kaihruai a, SCERT director Caroline Zoramthangi leh MLDB chairman R Lallianzuala te pawhin thu an sawi.

THAWNTHU TAWI INZIAHSIAK
1-na Zonunkimi, Dinthar, English Congregation School
2-na Lalzarzovi, E Damdiai, Damdiai Upper P/S
3-na Lalliansiami, Chhinga Veng, Chhinga Veng M/S