Good Friday urhsûn taka hman a ni

Isua thihna leh thawhlehna hunpui vuakvêt a ni mek a, Mizorama kohhran hrang hrangte'n April 17, Ningani zan aṭang khan urhsûn takin an hmang a, nimin khan Good Friday hman a ni.

Mizorama kohhran pawl hrang hrangte chuan Good Friday hi urhsun takin an hmang a, Ningani zan khan 'Venpui zan' an hmang hlawm a, kohhran tam takah Lalpa Zahriah Sakramen kilho a ni.

Mizoram Presbyterian Kohhran chuan Mizoram Synod aṭanga thupui thlan hmangin Pathian thu an ngaithla a, kohhran dangte pawhin an hmunpui aṭanga thlan thupui an nei hlawm bawk.

Catholic kohhrante chuan Ningani zan khan Isua'n a zirtirte nen zanriah hnuhnung an kîl pualin Eucharist an buatsaih a; Isua zirtir angin ke sil rawngbawlna hun an hmang. Isua inpekna leh rawngbawlna hriat reng nan puithiamte'n biak-ina inkhawmte ke an silsak a, venpui hun an hman zui a ni.

Nimin Good Friday chhun khan Mizoram hmun hrang hranga Catholic kohhrante chuan Isua'n Kalvari tlang pana kraws a put hriat reng nan Kraws Kawngzawh an buatsaih a, biak-inah lutin, an inkhawm zui a ni.

Good Friday hi March 20 leh April 25 inkara thla bial hnaih ber Zirtawpni-ah hman ṭhin a ni a, chumi dawta Pathianni hmasa ber chu Easter Sunday a ni. Good Friday/ Easter Sunday hma chiah Pathianni chu Tumkau Ni (Palm Sunday) a ni a; Easter Sunday aṭanga chhiara ni 50-na chu Pentikos Ni a ni bawk. Good Friday hi thla bial lai hun nen chhût a nih avangin ni (date) bik a awm lo.