KHAWTHLIR

Easter Sunday

Naktuk Pathianni hi Isua khenbeh a nih hnua a thawh lehna ni, Easter Sunday a ni a, Mizorama kohhran hrang hrangte'n an lawm dawn. Kohhran tam tak chuan naktuk zing ni chhuah rual velin mualah inkhawm - Easter Sunrise Service an hmang dawn a, chawhma, chawhnu leh zanahte biak-inah inkhawm a ni ang. Kohhran tam ber chuan thawhlehna lawm nan chawhma inkhawm bânah thingpui ruai an ṭheh dawn a ni.

Chetsualnaah thi

April 17, Ningani zing khan truck (Mahindra V 20) bungraw phur chu Keifang daiah chesualin kawng chhak lamah a let a, a khalhtu Gospel Lalremruata (25) s/o Haukhama, Champhai Zion Veng chu truck-in a delh hlum. Truck chetsual hun tak hriat a ni lo a, zing dar 5 velah zin veivâkin an hmu a, police leh Keifang khawtlang hruaitute'n an enfiah chuan a lo thi tawh a ni.

MLA-in enfiah

South Tuipui bialtu MLA Jeje Lalpekhlua chuan April 17, Ningani khan South Tuipui bial leh Hrangturzo bial inkal pawhna kawng South Chawngtui leh North Vanlaiphai inkar kawng siamṭhat dan tur a enfiah. Jeje-a chuan, "Hrangturzo bialtu MLA nen pawh kan theihna chinah hmalak zel kan tum," a ti.

Minister hoin sawiho

Cyclone Remal vanga kum 2024-a Hlimena chhiat tâwk chhung­kuate awm lailawkna, Transport department rama awm mekte awm zel dan tur April 17, Ningani khan Disaster Management & Rehabi­litation minister Prof. Lalnilawma hoin sorkar hotute'n an sawiho. Transport department chuan Hlimena an ram hi hnathawh nan an hmang duh tawh a ni.

Adviser to CM leh AMCECC inkâwm

Adviser to CM (Political) Lalmuanpuia Punte, MLA chuan April 17, Ningani khan a pisaah All Mizoram CSS Employees Coordination Committee (AMCECC) hruaitute a kâwm a; Mizoram sorkarin CSS hnuaia thawkte dah ngheh theihna tur dan a siam duh loa an nawrhna chu titawp turin a ngen. AMCECC hruaitute chuan an dinhmun leh an harsatna tawhte an sawifiah a, sorkar chungah beiseina sang tak an neih thu an sawi bawk.

Ṭanpuina sem

Fisheries department chuan Pradhan Mantri Matsya Sampada Yojana hnuaia sangha dil khuah leh leileta sangha khawi ṭanpuina diltu mi 80 hnenah April 17, Ningani khan Saitualah ṭanpuina an sem. Saiuala fisheries development officer Zomuansangi chuan, ṭanpuina dawngtute chu tih tak zetna thinlung púa thawk tur leh ṭhahnemngai taka scheme tihlawhtling turin a chah.

Training buatsaih

Hnahthial District Village Disaster Management Committee member-te pualin April 17, Ningani khan DC conference hall-ah training buatsaih a ni a, bawrhsap K Vanlalruatin'n a hmanpui. VLDMC hruaitute hnenah tarpauline, report pekna tur VLDMC chairman seal leh VLDMC contingency fund-te sem a ni.