Hmun pathumah Poshan Pakwada hmang

Nu leh naupang tana ei tur ṭha leh hrisel pawimawhna inzirtirna, Poshan Pakwada pualin April 17, Ningani khan Kolasib, Serchhip leh Hnahthialahte kawng hrang hrangin hun hman a ni.

Poshan Pakhwada hi April 8-22, 2025 chhung hman tur a ni a; Kolasib-ah chuan Krishi Vigyan Kendra (KVK) bultumin Kolasib Vengthar Anganwadi Centre-ah nu, nausen leh naupangte tana chawṭha pawimawhna inzirtirna neih niin, nu leh naupang 110 vel an tel.

Hun hman kaihruaitu Kolasib KVK senior scientist & head Dr Michelle C Lallawmkimi chuan, "Kan khawtlang siamṭhat nana bul ṭanna kailâwn hmasa ber chu anganwadi centre hi a ni," a ti a; KVK programme assistant Lalrinpuii Sailo leh subject matter specialist R Lalchhandami ten thil pawimawh hrang hrang an zirtir a ni.

Serchhipah chuan Integrated Child Development Services (ICDS) project office-in 'Poshan Health Walk on Importance of 1000 Days' an huaihawt a; sorkar department hrang hrang, anganwadi worker leh helper mi 70 an tel.

Hnahthialah pawh District ICDS Project buatsaihin Anganwadi Centre no. III-ah 'Poshan Pakhwada, 2025 - Fruits and Vegetables Day' hman a ni. ICDS thawktu te, anganwadi worker-te leh helper te, self help group hruaitute leh nu leh naupangte an tel. Fruits and Vegetables Day pualin kawng an zawh nghal a ni.