Ui â hri laka inven dan tur sawiho; Aizawl district-ah ui a hri la awm lo

Aizawl district bawrhsap Lalhriatpuia hoin April 17, Ningani khan sorkar hotu te, khawtlang hruaitute leh pawl aiawhte'n Aizawl district-a ui â hri (rabies) lêng thei laka invên dan tur an sawiho. Tun dinhmunah Aizawl district-ah ui â hri kai finfiah a la awm loh thu tarlan a ni.

Ṭhutkhawmah hian Mizoram-Manipur ramri check gate-ah Police leh AH&Vety department mite'n endikna siam turin a rêl a; May 2025 chhungin a tam thei ang ber anti-rabies vaccine pe tura hmalak ni se, mipui hnenah ui a hri awm dan leh inven kawnga hriat tur pawimawh inzirtirna uar zawka kalpui ni se, an ti.

Sawihonaah hian Aizawl SP, AH&Vety, AMC, Central YMA, Aizawl City Local Council Association, VC Association leh JB Foundation aiawhte an tel a; Aizawl district chhunga LC leh VC-te kaltlanga ui â hri danna (anti-rabies vaccine) la leh la lo awm dan dinhmun lak khawm leh, vaccine la lote hnena pek dan tur ruahman a ni.

April 2025 aṭanga sorkar leh private clinic aṭanga anti-rabies vaccine pek chhuah dan tarlan a ni a, ui a hri awm dan, natna lan chhuah dan, inkai chhâwn dante sawiho a ni.