Sorkarin ram a pe thei a nih chuan PCI-in Mizoramah centre din a huam

Pharmacy Council of India (PCI) president Dr Montu Kumar M Patel chuan April 17, Ningani khan Aizawl Press Club-ah thuthar thehdarhtute a kâwm a; ram a awm chuan Mizoramah skills development training centre din an inhuam thu a sawi.

Dr Montu Kumar chuan, Mizorama skill development training centre din chungchang chu Health minister Lalrinpuii a sawipui tawh thu a sawi a, "Mizoram sorkarin a ram tur min ngaihtuahsak thei a ni chuan a din lam chu central aṭangin kan inhuam a ni," a ti.

Pharmacy Council of India chu thuneihna sang tak nei a nih thu sawiin Dr Montu Kumar chuan, "State council pawhin pharmacist-te training leh skill development neihpui reng a tum," a ti a; dan ang chuan damdawi dawrahte pawh pharmacist an ṭhu reng tur a nih thu a sawi.

PCI President chuan, Mizoramah pharmacist post sanction 122 awm chungin pharmacist post ngheta awm mi 25 chiah lâk an nih thu sawiin, pawi a tih thu a sawi a, "Sorkar damdawi-in hrang hrangah pharmacist thawktu an indaih lo hle a ni," a ti.

Dr Montu Kumar chuan, Mizorama damdawi hmansual leh damdawi ṭha lo a tam lutuk chu veiawm a tih thu sawiin, "Damdawi khuahkhirhna a ṭhat lehzual theih nan Food and Drug Administration hnuaia drug control officer sanctioned post 12 a awm laiin post panga chiah hnawhkhah a ni," a ti a, post ruakte chu hnawhkhah vat theih ni se a duh thu a sawi.