Minister-in Kulikawn Hospital a tlawh

Health & Family Welfare minister Lalrinpuii chuan April 16, 2025 khan Kulikawn Hospital a tlawh a; damdawi-in thar sakna tur buaipui mek a ni mah se, tuna damdawi-in awm mekah mipui tan ṭangkai zawka hna thawh theih dan tur a enfiah.

Kulikawn Hospital-ah hian damlo khum 50 a awm a; naupang lam doctor leh hmeichhe lam doctor ṭha tak tak leh ha lam doctor pali an awm mek bakah, medicine doctor ṭha tak dah thar a nihh thu sawiin Minister chuan, Kulikawn Hospital-a doctor thiam tak takte chu mipuiin tun aia nasa zawkin pan se a duh thu a sawi.

Health Minister chuan, Mizoram Universal Health Care Scheme (MUHCS) a hlawhtling chho zel tih sawiin, "April 1-14 chhungin mi 153 kan refer tawh a, hmun hrang hranga PHC, CHC leh district hospital leh ZMCH-a thawktute'n mipui tan theihtawp an chhuah," a ti a; Kulikawn Hospital-a thawkte chu ṭan la lehzual tura a fuih bakah, nurse-te chu damlote ṭawngṭaipui tam turin a chah.

Kulikawn Hospital medical superin-tendent Dr James RE Mawia chuan, a tlangpuiin khum zinga a zatve aia tam hret, 52% vel a khah deuh reng thu leh, Mizo-rama psychiatry ward nei awm chhun an nih avangin psychiatry bed 24 chu a khah deuh reng thu an sawi a; MUHCS hnuaiah damlo 30 an enkawl tawh thu a sawi bawk.