Zirtirtute'n badge dum bel an tum

Mizoram Government School Teachers Union (MIGOSTU) chuan thuchhuah siamin, lungawi lohna lantir nan leh an thil phutte tihlawhtling tura sorkar kar nan April 21-25, 2025 chhungin an hnathawhnaah badge dum an bel dawn tih an puang.

MIGOSTU hian Mizoram sorkarin August 1, 2023-a sorkar sikula a dah (provincialise) tawh, June 18, 2024-a Council of Ministers ṭhukhawmin dan siamṭhat ngai leh fel lo chhuanlama a ṭhiah leh zawng zawngte chu a rang thei ang bera provincialise leh turin sorkar an phût a ni.

Enrolment criteria-ah thingtlang leh khawpui sikulte tan tehfung inang siam chu an duh lo tih sawiin MIGOSTU chuan, "Thingtlanga sikulte tan engtik khawtikah mah provincialise kan nih ve theih lohna tur dan ṭha lo tak nia kan hriat avangin siamṭhat ngei ni rawh se," an ti.

MIGOSTU member sikul - high school leh middle school-a headmaster, an thawh tirha sorkar pawm DPC-in a lakte chungchangah, "Mizoram sorkara an counterpart-te basic pay leh half allowance hmanga a enkawl senior grade leh selection grade hial kai tawhte mualpho taka an tlak leh vekna tur dan hi a rang thei ang berin sût leh rawh se," an ti bawk.