Ram siamrem dan tur sawiho

Khawzawl District Government Land Authority chuan April 17, Ningani khan chairman K Vanlalṭhiana, bawrhsap kaihhruaiin Khawzawl district-a sorkar ram hrang hrang hman dan tur leh siam rem dan tur an sawiho.

Bawrhsap chuan, Government Land Authority chu sorkar ram neihte mumal taka chhinchhiahna tur te, sorkar ram neih dan siamrem leh a ṭul anga department mamawh zawkte tana sem dan tur te, sorkar ram enkawlna leh a hmasawnna atana sum hman dan tur ngaihtuah tura din a nih thu a sawi a; sorkar department hrang hrangin mahni ramte ui loa khawtlang tan leh ram tana siamrem inhuam zel turin a sawm.

Ṭhutkhawmah hian sorkar office hrang hrang hotute leh VC member-te an tel a; Treasury officer ram dil chungchang te, District Court awmna tur chungchangte leh Superintendent of Police (SP) chenna tur ram chungchangte an sawiho a ni.