Lokayukta-in thubuai 77 ziak lut tawh; Hming leh biakpawhna tur ziak turin ngen

Mizoram Lokayukta chuan thuchhuah siamin, Lokayukta-a complaint thehlut turte chu an hming leh biakpawh theihnate chiang taka ziak turin an ngen a; Lokayukta-ah a din tirh aṭangin thubuai 77 ziah luh a nih tawh thu an tarlang.

Mizoram Lokayukta tarlan danin, Lokayukta din tirh aṭangin thubuai 77 ziah luh niin, chung zinga 55-ah preliminary enquiry tih a ni tawh a, preliminary inquiry aṭangin chhui puitlinga chhui tawh (investigation) 26 a awm.

Thubuai thehluttute leh eiru nia puhna complaint zirchianna (examination and hearing) aṭangin complaint 30 chu tihtawp a ni tawh a; Sorkar department thuneitute hnenah departmental proceeding ti tura pek thubuai pali a awm tawh bawk.

Lokayukta chuan, tun hnaiah hming awm lo leh thubuai thehluttute biakpawh theih loh complaint a awm ṭhin thu tarlangin, "Thu zawh belh ngai leh complaint kal zel dan hriattir turin complaint thubuai kalpui chhunzawm zel a harsa ṭhin," an ti. Complaint-ah hian thubuai thehluttuin a hming leh biakpawh theihna chiang taka ziah lan tur a nih thu sawiin, "Thubuai thehluttuin a hming leh nihna thup a duh a nih pawhin thupsak tlat tur a ni," an ti.

Eirûkna thubuai thehluh (complaint) chu lehkha pheka ziakin Mizoram Lokayukta office-ah pisa kai hun chhungin thehluh theih reng a nih thu te, email hmangin mizoramlokayukta@gmail.com leh mizoram.lokayukta@mizoram.gov.in ah pawh thehluh theih reng a nih thute Lokayukta chuan an an tarlang bawk.

Mizoram Loayukta hi Mizoram Lokayukta Act, 2014 hmangin March 11, 2019 khan office hawn a ni a, chairperson hmasa ber chu C Lalsawta, IAS (Rtd) a ni. Tunah hian chairperson chu Lalmalsawma, IAS (Rtd) a ni a, member pahnih awmin, full body-in hna an thawk mek. Thawktu (staff) dang 28 an awm bawk a ni.