Easter Sunday hlim taka lawm a ni

Nimin Pathianni khan Isua Krista krawsa khehbeh a nih hnua a thawh lehna ni, Easter Sunday a ni a, Mizorama kohhran hrang hrangte'n uar takin an lawm.

Mizoram Presbyterian Kohhran leh Mizoram Baptist Church (BCM) tualchhung kohhrante chuan nimin zing khan zing ni chhuah rual velin thawhlehna lawmna inkhawm, Easter Sunrise Service an hmang a, chawhma, chawhnu leh zan inkhawmahte hmunpui aṭanga thupui thlan hmangin Pathian thu an ngaithla. Kohhran tam ber chuan chawhma inkhawm bânah thingpui ruai an ṭheh.

Salvation Army corps hrang hranga band-te'n nimin zing varṭian aṭangin tawtawrawt hmangin khawlai leh kawtthlerahte Isua thawh leh thu an puang a; corps tam berin chawhma inkhawm bànah thingpui ruai an ṭheh. Isua thawh leh thu puanga varṭiana tawtawrawt ham hi kum 1967 aṭanga tun thlengin an la ti ta zel a ni.

Catholic kohhrante chuan Inrinni zan khan Isua thawhlehna an urlâwk a, 'Krista chu êng a ni' tih lantir nan Easter Vigil hun hmangin mei thar lak a ni a, biak-in kawtah khawnvar chhi kaiin, biak-in chhungah an lut a, Pathian biak inkhawm an nei zui. Nimin khan inkhawm lehin, kohhrante'n Easter ruai an ṭheh a; zanah sathau khawnvar chhiin Easter kawngzawh an nei bawk.

UPC kohhrante leh kohhran pawl dangte pawhin Easter Sunday hi hlim takin an lawm a ni.