Sorkara thuneitute'n raltlante bike an man bakah, a ke an thlawnsak
Tun hnai khan Lunglei Police-te'n Lunglei khawpui chhunga Myanmar aṭanga rawn raltlante'n Kenbo 125 bike an rawn ken luhte chu duh duha veivahna atan an hman loh nan a ke an thlawnsak. Aizawlah pawh Transport enforcement-te'n Sairang Sihhmuiah Myanmar bike an man nual bawk.
Myanmar aṭanga rawn raltlante awm khawmna Ṭhaizawl camp-ah Lunglei police-te chu SP Jerome Lalmuankima hoin April 17, 2025 khan an kal a, Lunglei Sub-Hqrs. YMA, MZP Hqrs. leh MSU Regional Hqrs hruaitute'n an ṭawiawm. Raltlante tih tur leh tih loh tur leh, thuneitute ruahmanna hrang hrang an siam leh an hrilh tawhte an bawhzui a, an bike-te chu dan loa lak luh a nih avangin a ke an thlawnsak a ni.
April 18, 2025-a police-te'n bike ke an thlawn zawng zawng chu 55 a ni a, Lunglei khawpui pawn lama raltlante'n Kenbo an rawn ken luhte pawh a ke thlawnsak zel an tum.
Bike netute lakah thubuai ziah luh a ni lo a; an hming leh veng chhinchhiah vek niin, Myanmar lama an haw dawnah police station aṭangin bike ke lak let theih a nih thu an hrilh a ni.
Transport department enforcement duty-te pawhin April 16 2025 khan Sairang Sihhmuiah Myanmar bike paruk an man. Bike an mante chu Kenbo 125 pali, Super Wave 135 pakhat leh Dayang pakhat a ni.
Bike mante chu man aṭanga thla thum chhungin a neitute'n District Transport Office (RA), Aizawlah ngaihven tur a ni a; thla thum chhunga ngaihven a nih loh chuan, thla thum a ral hnuah chuan thuneitute'n eng ang pawhin ti mah se, sawisel theih a ni tawh dawn lo tih Aizawl DTO Office chuan an tarlang.
Aizawl DTO Office chuan, tun hnaiah ram dang siam lirthei, a bik takin lirthei ke pahnih nei dan loa Mizorama lak luh a awm nual tih tarlangin, ram dang aṭangin dan loa lirthei lak luh phal a nih loh thu an tarlang bawk.