LMC hotute'n tui lâkna hmun an tlawh

Lunglei Municipal Council (LMC) hotute chuan April 19, Inrinni khan an chairman Lalzuithanga hoin Lunglei khawpui tui lakna leh AMRUT 2.0 hnuaia Tlawng lui khuah (gravity dam) hna thawh mekte an tlawh. Tuikhuah hna 35% vel zawh a ni tawh a, August 2025-ah zawh hman tura ruahman a ni.

PHE department hotute tarlan danin, Tlawng lui khuap turin February 27, 2024 khan HS Construction chu inremna ziahpui a ni. Hna ṭan tura hmanrua lak khawm ṭan a nih laiin kum 2024 fûrin a nan avangin February 2025-a zawh tura tih ni mah se, zawh hman a ni lo a, hna thawh hun chu August 2025 thleng pawhsei a ni.

Tlawng lui khuah hna hi AMRUT 2.0 sum vbc 4.7 hmanga thawh tura ruahman ni mah se, sorkar laipui aṭanga pawisa dawn a la nih loh avangin contractor hnenah pawisa pek a la ni lo a, contractor-in a sum sengin a thawk mek.

Lalzuithanga chuan, ṭhál laia tui harsatna thleng ṭhin avangin tuikhuah mek chu mipuiin zawh hun an nghahhlelh thu a sawi a; nakkum lamah Lunglei khawpuiin tui harsatna lian tak a tawh tawh loh nan a hun takah ṭha taka thawk zo turin contractor a chah.

LMC hotute chuan, Lunglei tui lâknaa tuikhuah mek chu chak zawka kalpui a nih theih nan theihtawp an chhuah dawn thu an sawi a; AMRUT 2.0 sum pawh a chhuah thuai theih nan hmalak an tum thu leh Lunglei tui lâkna tihhmasawn zelna kawngah pawh theihtawp an chhuah tur thu an sawi bawk.