Hnatlanga thawk chhuak turin sâwm
Zoram Thar Zofate Lairelna Inpui chuan April 19, Inrinni khan Aizawl Press Club-ah thuthar thehdarhtute an kâwm a, vawiinah Thenzawlah Zofate Pathian Biak Inpui saknaah ban an phun ṭan dawn a, ban phun hnatlanga thawk chhuak turin Mizoram mipui an sâwm.
Zoram Thar ziaktu lian Lalruatfeli Hlawndo chuan, a hmuna hnatlang thei lote pawh hnatlang thawhlawm hmangin hnatlan theih a nih thu sawiin, "Banpui hi 50 phun phawt tur a ni a, a thawh khatna a ni ang. Ban pakhat man hi Rs 50,000 anga chhut a ni. A ban man hi mimal, chhungkua, pawl, kohhran emaw hnam chipeng hrang hrang anga thawh duhte tan a remchang dawn. A thawhte chu Zoram Thar Zofate Lairelna hminga citation pek an ni ang," a ti.
Lalruatfeli chuan, Zo fate Pathian Biak Inpui sakna atan cheng nuai 10,000 vel a ngaih dawn nia sawiin, "Cheng nuai 40 vel sen a ni tawh. A theih ang angin pawisa kan ngaihtuah zel dawn," a ti a; July 2025-ah an president Rev. Dr Zaichhawna Hlawndo nen biak-in chungchangah USA-ah an kal dawn thu a sawi bawk.