Tuikual North hmasawnna tur sawiho

April 19, Inrinni khan Tuikual North huam chhunga hmasawnna hnathawh tur hrang hrangte bialtu MLA Lalnghinglova Hmar, minister of state hoin khawtlang hruaitute'n Local Council House-ah an sawiho.

Lalnghinglova Hmar chuan, Tuikual North chu Aizawl veng laili tak a ni chungin hmasawnna kawngah hmabak a la tam tih a sawi a, "Kan hun chhungin theihtawp chhuaha hmasawnna hna thawh kan tum a, ruahmanna awmte hi khawtlang hruaitute nen sawiho hmasak hi a ṭul a ni," a ti.

Sawihona hun hi Tuikual North LC chairman F Kamhmunga'n a kaihruai a, LC member-te bakah YMA, MUP, MHIP, ZPM block leh unit president-te an tel. Sorkarin hmasawnna hna thawh tura a ruahman chungchang an sawiho.

Tuikual North huam chhungah hian Khelo India aṭanga Multipurpose Indoor Stadium sakna tura sum lo kal tur hman a nih theih dan tur te, a hmunhmain a zawh leh zawh lohte leh hna thawh dan turte inpawh taka sawiho a ni.

Hei bakah hian veng chhunga electric transformer thar bun te, health clinic awm mek chu health and wellness centre-a hlang kai tura sorkara ngenna thehluh chungchang te, veng mawng lama kawngpui sial tur Aizawl West Outlet chungchang leh veng hmasawnna tur thil pawimawh dangte an sawiho bawk.