International Half Marathon atan mi 200 chuang an inziak lut tawh

Sports & Youth Services minister Lalnghinglova Hmar hoin nimin khan a pisaah sorkar hotu te, khawtlang hruaitute leh pawl aiawhten Aizawl International Half Marathon 2025 (AIHM) neih tur an sawiho a; half marathon tlan tur hian mi 200 chuang an inziak lut tawh tih tarlan a ni.

Lalnghinglova Hmar chuan, Aizawl International Half Marathon chu Mizoram sorkara Sports & Youth Services department leh Innovations India ṭang dun buatsaih a nih thu a sawi a, "Athletics Federation of India pawmpui a ni a, kum dangah pawh neih chhunzawm zel tum a ni. Intlansiak a nih piah lamah hian ṭhalaite hriselna leh fitness-a hmasawnna tur leh, ram dang leh hnam dang mithmuha Mizoram mawina pho chhuak tura ruahman a ni a, tourism pawhin hma a sawn phah turah kan ngai," a ti.

Sports Minister chuan, Mizo ṭhalai bakah, India ram chhung leh pawn aṭangin AIHM-a tel tur an ṭhahnem dawn tih sawiin, "Tunah hian Kenyan runner mi panga bakah Services aṭangin mi eng emaw zat an rawn tel dawn tih a chiang tawh," a ti a; Governor leh Chief Minister-te chu AIHM chief patron an ni a, marathon an phûrpui thu a sawi.

AIZAWL INTERNATIONAL HALF MARATHON

* Rajiv Gandhi Stadium aṭanga tlan ṭan tur a ni a, RG Stadium-ah bawk tawp a ni ang.

* Category pathum – km. 21.1, km. 10 leh km. 5 a awm.

* April 21, 2025 thlengin tlan tura inziak lut mi 200 chuang an awm tawh.

* Registration mi pakhat tan Rs 799 a ni a, online registration https://aihm2025.com/ leh Millenium Centre kawtah offline registration kalpui mek a ni a; tunkarah sikul leh college-ahte offline registration kalpui tum a ni.

* Registration fee hian ei tur leh thil dang dawn tur a huam dawn.

* Lawmman hrang hrang atan Rs 10,00,000 sen ral a ni dawn.

* Intlansiak tawpnaah cultural performance leh concert buatsaih a ni ang.