Department dawr nuam tak i ni ang u - Revenue Minister

Mizoram Survey and Land Record Service Association (MISLARSA) chuan nimin khan an meeting hall-ah inkhawmpui an hmang a; khuallian Land Revenue & Settlement (LRS) minister B Lalchhanzova chuan, LRS department chu dawr nuam tak nih tum turin a chah.

B Lalchhanzova chuan, LRS department chu department zahawm, Mizoram chhiat ṭhata mawhphurtu an nih thu sawiin, "Kan inenkawl danah hma lam êng kan neih avangin thil tihfel a awlsam ṭan hle. Vawiin aṭang chuan min dawrtute hriat theih turin kan hmelah pawh phûrna lantir tum ila, department dawr nuam tak nih tum turin theihtawp i chhuah ang u," a ti.

Thlêmna leh vauna an dawn ṭhin a rin thu sawiin Minister chuan, "Thil dik lo chu huaisen taka in dodal ngam nan kei pawh dem kai lo tura kut faia awm ka tum," a ti a; an department-a thawk zawng zawngte phûrna leh huaisenna petu ni thei se a duh thu a sawi.

B Lalchhanzova chuan, revenue inrêlbâwlna chak lohna leh ṭhat lohna ram a changkan thei loh thu sawiin, "Hemi kawngah hian kan sorkar hian kan department pawimawhna a hmu thiam a, state tana sum thawk chhuaktu kan nih bawk avangin thuam chak tum mek a ni," a ti.

LRS Minister chuan, thawktu lak belh te, revenue dan ennawn te, district office building sak ṭhat te, thawktute quarters sak ṭhatahte sorkar a inhawn em em thu a sawi a; department-a thawktute chuan mawhphurhna tam tak an neih chu hawihhawmna nena hlen chhuak ṭhin turin kalkhawmte a chah a ni.