Fûr atan invêng lâwk turin mipui chah

Serchhip district bawrhsap Paul L Khuma chuan hriattirna chhuahin, fûr lo thleng turah chhiatna thleng thei laka lo inveng lâwk turin district mipui a chah. Chhiatna a thlenin Serchhip District Emergency Operation Centre phone number 9862116104/8119978919 leh toll free no. 1077-ahte hriattir theih reng a ni.

Bawrhsap chuan, fûrpui a thleng leh dawn ṭan tih tarlangin, "Mizoram hmun hrang hrangah ruahsur, khawipui ri, ṭêk tla leh thli thawk thei dinhmunah kan lo ding leh ta a, Serchhip district mipuite fimkhur tur leh inkaihhruainate zawm turin ka chah che u a ni," a ti. Chhiatna a thlenin phone number tarlante bakah mahni bialtu zonal officer-te hnenah inhriattir theih a nih thu a tarlang bawk.

SERCHHIP DISTRICT MIPUI HRIAT TUR

¤ Mahni in leh lote thli leh ruah dâwl thei turin a ṭul anga thawm ṭhat tur.

¤ Tui paihna leh tui luankawrte ṭha taka siam tur.

¤ Ruahsur vanga leimin thei laite hriat chiana fimkhur ni se.

¤ Tui hmun, lui leh ramhnuaiahte ruahsur nasat leh ṭêk tlak laiin kal loh a ṭha.

¤ Ruah vanga kawlphetha (power supply) neih loh theih a nih avangin electric hmang thil charge lâwk theih apiang charge lawk a ṭha.

¤ Rîkrum thila mamawh tur–torchlight, emergency light, first aid kit, tui thianghlim leh ei turte inrin lâwk a ṭha.

¤ Ṭêk tlak laiin thingkung leh electric ban hnaihah awm loh tur.