KHAWTHLIR

Tui pump khawl chhia

PHE EE Liantluanga Chohte chuan thuchhuah siamin, Khawzawl châwmtu Tuichang lui tui pump-na khawl pahnih chu a chhiat avangin tuiah Khawzawl mipuite'n hun eng emaw chen harsatna an tawk dawn a, tui ren tur leh ruahtui hmang ṭangkai turin mipui a ngen. Tui pump khawl ṭha lote siamṭha thuai tura hmalak a nih thu leh khawl pakhat zawk Guwahati-ah thawn a nih tawh thu a tarlang.

MLA-in tlawh

South Tuipui bialtu MLA Jeje Lalpekhlua chuan nimin zing khan Hnahthial District Hockey Association hruaitute nen Hnahthiala synthetic hockey turf siamna hmun tura ruahman an tlawh a; Hnahthiala a office-ah a bial mipuite tan an mamawh thlenna hun a hawn bakah, Hnahthial High School a tlawh a ni.

Chhura Thawnthu

Chief minister Lalduhoma chuan nimin khan Assembly Annexe conference hall-ah Dr RL Thanmawia ziah 'Chhura Thawnthu' (Hnam hrang hrangte sawi dan) tih lehkhabu a tlangzarh. Chief Minister chuan, Zo fate hnam ṭobul chhui chhuaha sorkar pawmpui leh mipui pawm tlan neih ṭul an tih thu leh a bul ṭantu tur an insiam chho mek thu a sawi.

JCB pahnih pe

Toyota Kirloskar Motor chuan Road Safety & Disaster Management lama hman atan Mizoram sorkar hnenah JCB pahnih an pe. Toyota Kirloskar Motor executive vice president Vikram Gulati chuan nimin khan chief minister Lalduhoma hnenah JCB chabi leh memorandum of agreement a hlan a ni.

AR-in Heroin leh meizial an man

Assam Rifles chuan April 19, 2025 khan Champhai Tlangsam pengṭhuamah Kenbo bike an lo tiding a, bike khalhtu Roneihtluanga (21), Champhai hnen aṭangin heroin hawng 10 an man. Heroin hi Excise & Narcotics department hnenah an hlan. April 19 vek khan Assam Rifles-te'n Melbuk leh Zokhawthar inkarah ram dang meizial - Red & Blue, Gold Land, Karaweik, Premium Gold leh V bawmpui (case) 46 an man bawk.