Home Minister-in Central Jail a tlawh

Home minister K Sapdanga chuan nimin khan Central Jail leh Central Women’s Jail a tlawh a; sorkar hotute nen Central Jail sak ṭhat laia jail tángte dah lailawkna tura ruahmanna an thlirho.

Home Minister hian Central Jail-a cheng nuai 90.23 sênga táng mi 70 vel awm theihna tur ward sak thar a hawng a; Central Women’s Jail-ah ward hrang hrang a fang bawk.

Central Jail hi September 15, 1986 khan hawn (commission) a ni a, a hlui bakah a chhiat tawh avangin SASCI Part-I hnuaiah cheng vbc 13.925 sênga sak ṭhat turin ruahman mek a ni.

Central Jail-ah hian táng mi 854 an awm mek a; chu'ngte chu - an chungthu ngaihtuah mek mi 457, hrehawm taka táng tura hrem mi 263, tàn pangngaia táng tura hrem mi 78 leh dam chhunga táng tura hrem mi 56 an ni.

Central Women’s Jail-ah mi 132 an awm mek a; an chungthu ngaihtuah mek mi 96, hrehawm taka táng tura hrem mi 23 leh tàn pangngaia táng tura hrem mi paruk an ni a, an nute an tàn vanga jail-a awm ve naupang pasarih an awm mek bawk.