KHAWTHLIR

UPSC result chhuak

Union Public Service Commission chuan nimin khan Civil Services Examination, 2024 result a tichhuak a, service hrang hrang atan mi 1,009 an tling. Tling mi 1,009-te chu General category-ah mi 335, Economically Weaker Section-ah mi 109, Other Backwarred Class-ah mi 318, Schedule Caste-ah mi 160 leh Schedule Tribe-ah mi 87 an ni. Mizoram aṭangin tling an awm lo a, Mizoram pawna Zo hnahthlak zingah erawh tling an awm thung.

Chetsualnaah thi

C Vanlalhlimpuii (15), Bethlehem Veng chu scooter (scooty)-a an chetsualna avangin April 21, Thawhṭanni zan dar 6 vel khan a thi. C Vanlalhlimpuii hi inneihnaa tel turin April 21 khan scooty-in an kal a, Thingdawlah a chuanna scooty leh truck intaiah a hliam a, Kolasib District Hospital panpui a nih hnuah a hliam tuar loin a thi a ni.

Minister-in hmanpui

Mizoram State Rural Livelihood Mission Staff Welfare Association (MISWA) chuan nimin khan Chanmari YMA Hall-ah General Body Meeting an hmang a, Rural Development minister Prof. Lalnilawma'n a hmanpui. Minister chuan, state hmasawnna tluantling a awm theih nan MZSRLM hmalaknate chu a pawimawh thu a sawi. Meeting hi MISWA chairman C Lalruatfela'n a kaihruai a ni.

Kawng khâr dawn

Traffic SP Stephen Lalrinawma chuan hriattirna chhuahin, Dawrpui Vengthara Dinthar pêng leh Tuikual lui inkarah tui chhia leh ek-in thli paihna tur pipe phûm a nih dawn avangin he kawngah hian vawiin aṭangin ni tin zan dar 10 aṭanga zing dar 4 inkarah lirthei tlan khap a nih thu a puang. Thupek hi hna thawh zawh hma chu hman tur a ni.

Vawk lak luh khap

Aizawl bawrhsap Lalhriatpuia chuan thupek chhuahin, Aizawl district-ah hmun dang aṭanga vawk, vawksa leh vawksa aṭanga siam ei tur lak luh khap a nih thu a puang. Aizawl district-a khua leh khua emaw, veng leh veng emaw inkara vawk inlakpawh tawn turte chu vawk hrisel ṭha chauh phal a nih thu leh, ASF hri lenna hmuna puan aṭangin vawk lak phal a nih loh thu a tarlang bawk.