Mizorama kuhva chingtu pawl pathumin kuhva man sa lilâma hralh pawi an ti

Vairengte Kuhva Chingtu Cooperative Society, Bilkhawthlir Kuhva Chingtu Cooperative Society leh Hachhek Bial Kuhva Chingtu Pawl te chuan thuchhuah inṭawm siamin, ram dang kuhva dan loa tawlhruk man sa lilâma hralh a ni chu pawi an tih thu an tarlang a, lilám tawh lo turin thuneitute an ngen.

Pawl pathumte chuan, kuhva man sa lilàm chu dan loa kuhva tawlhtute duh dan a ni a, lilàm a nih theih nan ukil ruaiin ṭan an la tawh ṭhin niin an sawi a, "Dan loa ram dang kuhva man sa Kolasib District Magistrate-in lilâma a hralh hi pawi kan ti. Kuhva tawlh ru ṭhinte thil tum leh duhthusam anga rorelna kalpui a ni hi kuhva chingtute tan a lungchhiatthlak tak zet a ni," an ti.

Kuhva rah man sa lilàm a ni chu kuhva tawlh rute tana kawng hawnsaknaa an ngaih thu sawiin pawl pathumte chuan, "Kuhva tawlh ru ṭhinte hian Mizoram sorkar kuta luhtir a, lilâm hmanga lei chhuah leh mai hi an thil tum leh thiam taka an sawi fo ṭhin a ni," an ti a; kuhva man sa lilâma tihral a ni chuan Mizorama kuhva tharte hralhna a chhiat phah hle dawn niin an sawi.

Kuhva chingtu pawlte chuan, Mizoram sorkar chu kuhva chingtute aw aia kuhva tawlh ru ṭhinte aw ngai pawimawh zawkah an ngaih thu sawiin, mak an tih thu an tarlang a, "Restricted tender anga auction kalpui hi a him lo a, kuhva tawlh ru ṭhinte'n an hming lang loin an lei chhuak leh zel thei dawn tihna a ni," an ti.

Pawl pathumte hian ram dang kuhva tawlhruk man sate chu lilàm hmanga hralh tawh lo turin thuneitute an ngen a; kuhva lilâm chhangtute hming, leitu tur thlan dan leh an leina rate puangzar turin sorkar an phût a ni.

Kuhva man sate tihral dan turah, lilam turas thutlukna siam chhan Kolasib District Magistrate-in a sawite chu chhuanlam tlinga an ngaih loh thu kuhva chingtu pawlte chuan an tarlang a,"Phûm bona tur an duh a nih chuan ram chu kuhva chingtute'n kan ngaihtuahsak thei. Hâl ral a nih dawn chuan sum tam tak sên a ngaih dawn thu leh environmental issue nasa tak a awm thei dawn nia thuchhuah pawh hi, sorkar sum sên ngai lo leh envirommental issue buai loin kan hâl ralsak thei reng a ni," an ti.

Kuhva man sa lilâma hralh a nih danah hian district thuneitute phênah sorkara thuneitu sang zawka kuhva tawlh rutute sam phiar zawmtute ruahmannaa an ngaih thu an tarlang bawk.