Poshan Pakhwada khârna hun hmang
Nu leh naupang tana ei tur ṭha leh hrisel pawimawhna inzirtirna, Poshan Pakhwada (Nutrition Fortnight) vawi 7-na chu April 8, 2025 aṭanga hman a nih hnuah nimin khan khâr a ni a; Mamit, Hnahthial leh Lengpuiahte hun hman a ni.
Mamita Siamliana Hall-ah nimin khan Poshan Pakhwada kharna inkhawm neih pahin VC-te pualin Poshan Abhiyan chungchang inzirtirna Women and Child Development office-in an buatsaih a; anganwadi worker-te leh District Child Protection Unit leh One Stop Centre-a thawkte an tel.
Hnahthialah chuan Krishi Vigyan Kendra (KVK) auditorium-ah anganwadi worker leh helper-te nen Poshan Pakhwada hman a ni a; KVK senior scientist & head Henry Saplalrinliana'n hawngin, CDPO F Lalnuntluangi pawhin a hmanpui.
Lengpui KVK pawhin Lengpuia anganwadi centre pasariha thawktute leh naupangte nen Poshan Pakhwada khârna hun an hmang a; KVK senior scientist Dr Rebecca Lalmuanpuii, subject matter specialist (agri extension) Vanlalruali leh programme assistant Biakhlupuii Chenkual ten an hmanpui.