Minister-in sikul sak mek a enfiah

School Education minister Dr Vanlalthlana chuan nimin khan Model Middle School, Chawnpui insawnna tur in sak mek a hmunah a enfiah a, bialtu MLA TBC Lalvenchhunga'n a ṭawiawm.

Cabinet Meeting thutlukna angin August 2021 khan Chawnpui Model M/S leh Chawnpui Presbyterian Kohhran chuan ram an inthleng a, Model M/S sawnna tur chu UDPA department kaltlangin sak mek a ni. Sikul sak mek hi Education Minister chuan a enfiah a; khawtlang hruaitute'n sikula lut zat an pun thu sawiin, ruahmanna an neihte an lo hrilh a ni.

Dr Vanlalthlana chuan, sikul sak mek chu zirlaite dâwl zo tak tur a nih bakah, sikulin a ken tel tur mamawhte ruahmannaah telh a pawimawh thu a sawi a; a ṭul dan angin building plan ennawn a nih tur thu leh, in sak zawh a nih hnuah UDPA-in School Education department hnenah an hlan tur thu a sawi bawk.