Lungleiah vohbikte hriselna dinhmun enfiah

Lunglei District Administration hmalaknaa Lunglei district-a vohbik, persons with disabilities (PwD)-te chawikanna tur ruahmanna, 'Project - Lunglei’s Empowerment for Access and Equity for all Persons' (Project LEAP) hnuaiah nimin aṭang khan Lunglei Civil Hospital-ah vohbikte hriselna dinhmun enfiahna, Health Assessment Camp buatsaih a ni a, district bawrhsap Navneet Mann-i'n a hawng.

Camp-ah hian specialist doctor-te'n vohbikte hriselna dinhmun an enfiah a, an dinhmun leh harsatna azirin disability certificate/unique disability identity card (UDID) siamsak an ni. UDID nei tawh leh kum 60 chung lam tan Artificial Limbs Manufacturing Corporation of India aṭanga wheelchair, bengdár, mitdel tiang, zakdawh tiang leh hmanraw dangte dawng thei tur enfiah a ni bawk.

Navneet Mann chuan, Project LEAP chu Lunglei district-a vohbikte'n sorkar aṭanga hamṭhatna leh chanvo an chan tur ang an chan theihna tur leh an dinhmun chawikan nana an mamawh anga hmalakpuina tura ruahman a nih thu a sawi a, "LMC-ah leh district-a RD block hrang hrangah vohbikte dinhmun zir chianna neih a ni tawh a, zirchiannaa a lan danin, Lunglei district-ah vohbik mi 1,262 an awm a, he'ng zinga 443 hian disability certificate/unique disability identity (UDID) card an nei," a ti.

Disability certificate/UDID la nei lo mi 819 (64.90%) an awm thu sawiin Bawrhsap chuan, "Vohbikte'n sorkar ruahmanna hnuaia hamṭhatna hrang hrang dawng thei turin UDID an neih ngei a ṭul," a ti a; Camp chu Lunglei district-a RD block hrang hrangah buatsaih zel tum a nih thu a sawi.