Urlawk nì-ah Aizawl bazar a lûn

Nimin kha Krismas urlawk nì a ni a, Aizawl khawpui khawlai leh bazarte a lûn hle a, dawr khar hun chungchanga sorkar thupekin zawm a hlawh lo hle. Sumdawngte chuan ni dang ai chuan niminah khan an inhralh ṭha zawk a, kum dang erawh chu an pha lo hle tih an sawi.

Sumdawng hrang hrangte sawi danin, thawmhnaw, sa, chawhmeh leh ei leh in tur dangte ni dang aiin an hralh ṭha tlangpui vek a ni. Khawlaiah chhuakvâk an tam a, damdawi dawr tih loh dawr dangte chu tlai dar 5 rik hmaa khar vek tur tih sorkar thupek awm mah se, dar 5-a inkhar lo dawr tam tak an awm a, zan dar 7 pelh thlenga inhawngte pawh an awm a ni.

Aizawl New Market enkawltu sorkar official-te chuan, Covid-19 lèng vangin kuminah bazarpuiah mi an tam lo tih an sawi a; thil rûk report pahnih chiah an dawn thu te, thil bo awm meuh loh thu te, naupang leh an chhungte inhloh report an dawn loh thute an sawi bawk.